മദ്ഹുറസൂല്‍

താഹാ റസൂലിന്റെ മദ്‌ ഹു പാടാം
റാഹത്ത് ചൊരിയണം തമ്പുരാനേ...
അബ്ദുള്ളയ്ക്കോമനപ്പുത്രനായി
ആമിനാബീവിതന്‍ പൊന്‍മകനായ്
ഖുറൈഷി ഗോത്രത്തില്‍ ഭൂജാതനായ്
ഖുദറത്തുടയോന്‍റെയന്ത്യ ദൂതന്‍...
റബീ ഉല്‍ അവ്വലിന്‍ പുണ്യമാസം
റബ്ബിന്‍റെ കരുണ നിറഞ്ഞ മാസം..!
മാനത്തുദിച്ച ഖമറു പോലെ
മക്കത്ത് തെളിയുന്നു തൂ വെളിച്ചം..!
അലീമാ മുലയൂട്ടിപ്പോറ്റിടുന്നൂ...
അലിവിന്‍റെ സാഗരം തീര്ത്തു താഹാ...
മുത്ത് മുഹമ്മദിന്‍ സൌമ്യ ഭാവം
മക്കാനിവാസികള്‍ക്കിഷ്ടമായി...
അല്‍-അമീനെന്നുള്ള പേര്‍ ലഭിച്ചു
വ്യാപാര സംഘത്തിലംഗമായി...
ഹീറാ ഗുഹയിലന്നേകനായി
താഹ റസൂലന്നിരുന്നിടുന്‍പോള്‍,
ദൂതുമായ്‌ ജിബ്രീലണഞ്ഞിടുന്നൂ...
തൌഹീദിന്‍ കുളിര്‍കാറ്റ് വീശിടുന്നൂ..!
സഹധര്‍മ്മിണിയാം ഖദീജ ബീവി
ആദ്യമായ് ദീനിലണിനിരന്നു...
പാരിനു നേര്‍വഴി കാണിയ്ക്കുവാന്‍
പാരം റസൂല്‍ തുനിഞ്ഞ കാലം,
ദ്രോഹങ്ങളേറെയും ചെയ്തുവല്ലോ
മക്കക്കാരായുള്ള ജാഹിലീങ്ങള്‍..!
എല്ലാം സഹിച്ചന്നു ദീനിനായി
അല്ലാഹു കല്പിച്ച വഴിതെളിക്കാന്‍
നബിതങ്ങള്‍ ധീരത കൈവിടാതെ
ലോക ചരിത്രം തിരുത്തിയല്ലോ..!

ബലിപെരുന്നാള്‍

അല്ലാഹു അക്ബര്‍ അല്ലാഹു അക്ബര്‍
ലാഇലാഹ ഇല്ലല്ലാഹു അല്ലാഹു അക്ബര്‍
അല്ലാഹു അക്ബര്‍ വലില്ലാഹില്‍ ഹംദ്...
ഖലീലിബ്രാഹീമിന്‍ ത്യാഗത്തിന്‍ സ്മരണയുമായ്
ബലിപെരുന്നാളിതാ വീണ്ടും വന്നൂ...
റബ്ബിന്‍റെ കല്പ്പനായാലോമനപ്പുത്രന്റെ
തലയറുത്തീടാനൊരുങിയപ്പോള്‍,
ആലം ഉടയോന്റെ അരുളപ്പാടുണ്ടായി
ആരംഭമോനേയറുത്തിടേണ്‍ടാ...
ഇബ്രാഹിം നബിതങ്ങളൊരാടിനെ ബലി നല്കി
ഇസ്മായീല്‍ പുത്രന് പകരമായി..!
വിശ്വാസികളെന്‍പാടും മക്കയിലേക്കണയുന്നൂ
ഹജ്ജിന്റെ കര്‍മ്മങ്ങള്‍ പൂര്‍ത്തിയാക്കാന്‍...
ഇസ്ലാമിന്‍ തേജസ്സായെന്നും തിളങ്ങിയ
ഇബ്രാഹിം നബിയോര്‍ക്ക് സ്തുതിയോതുന്നൂ..!
ലബ്ബൈക്ക മുഴങ്ങുന്നൂ കഅബാശരീഫിന്‍കല്‍
റബ്ബിന്‍റെ തിരുമുമ്പില്‍ കുമ്പിടുന്നൂ...
ഈദിന്റെ സന്ദേശം നേരായ ദീനിന്റെ
പാതയിലേക്ക് നയിച്ചിടുമ്പോള്‍
തക്ബീര്‍ ധ്വനികളുയരട്ടെ വാനോളം
തൌഹീദിന്‍ ശബ്ദം മുഴങ്ങീടട്ടെ..!

പെരുന്നാള്‍ പുലരിയില്‍...

ഈദുല്‍ഫിതറിന്റെ നാളണഞ്ഞൂ
ഇസ്ലാമിന്‍ പുണ്യദിനവും വന്നൂ...
പടിഞ്ഞാറെ മാനത്തോരന്‍പിളി പൊങ്ങി
പള്ളികളില്‍ തക്ബീറിന്‍ ധ്വനി മുഴങ്ങി
അല്ലാഹു അക്ബര്‍,അല്ലാഹു അക്ബര്‍
ലാ ഇലാഹ ഇല്ലല്ലാഹു അല്ലാഹു അക്ബര്‍
അല്ലാഹു അക്ബര്‍ വലില്ലാഹില്‍ ഹംദ്
പരിശുദ്ധ റമളാനും വിട പറഞ്ഞു
പെരുന്നാളിന്‍ തിങ്കളുദിച്ചുയര്‍ന്നു...
ഈത്തപ്പഴത്തിന്റെ നാട്ടില്‍ നിന്നും
അത്തറിന്‍ പരിമളമെത്തിടുന്‍പോള്‍,
മുത്ത് റസൂലന്ന് കാട്ടിത്തന്ന
സത്യത്തിന്‍ നേര്‍വഴി പിന്തുടര്‍ന്നോര്‍
ഈമാനുറപ്പിച്ച് മുന്നേറുമ്പോള്‍ ,
ഈടുറ്റ നേട്ടങ്ങള്‍ സ്വന്തമാക്കും!
ഫിതര്‍ സക്കാത്തും കൊടുത്തിടേണം
വിധി പോലെയെല്ലാം നടത്തിടേണം..
മൈലാഞ്ചിയണിയുന്ന മന്കകള്‍ക്ക്
മൈക്കണ്ണില്‍ സ്വപ്‌നങ്ങള്‍ പൂത്തിറങ്ങി
പുതു വസ്ത്രമണിയുന്നുണ്ടാമോദത്താല്‍
ഈദിന്റെ സന്ദേശം കൈമാറണം...
ശാന്തി സമാധാനം നാട്ടിലെങ്ങും
ശാശ്വതമാകുവാന്‍ പ്രാര്‍ത്ഥിയ്ക്കേണം
ഇബിലീസിന്‍ തെറ്റായ വഴിയിലൂടെ
ഇനിയും നടക്കല്ലേ നിങ്ങളാരും...
നിയ്യത്തെടുക്കേണം പുണ്യ നാളില്‍
നേരായ മാര്‍ഗ്ഗത്തെ സ്വീകരിയ്ക്കാന്‍
നോമ്പിന്‍ വിശുദ്ധി നാമെന്നുമെന്നും
ഇമ്പമാര്‍ന്നുള്ളത്തില്‍ സൂക്ഷിയ്ക്കേണം!

വിധി

എല്ലാം പടച്ചോന്റെ വിധിയാണെന്ന്
തെല്ലും മടിയാതെ കരുതിക്കൊള്‍വീന്‍..
താഹാ റസൂലിന്റെ പിരിശത്താലെ
റാഹത്തൊരുപാടിന്നിറങ്ങുന്നുണ്ടേ..
പാരം ദുനിയാവില്‍ ജനിച്ചോരെല്ലാം
ഭാരം ചുമക്കുവാന്‍ വിധിയ്ക്കപ്പെട്ടോര്‍!
കലിമയുറപ്പിച്ച് കഴിഞ്ഞോര്‍ക്കെല്ലാം
കരുണ ചൊരിയുന്നോനിലാഹാണല്ലോ!
നാളെ മഹ്ശറ തിരുസഭയില്‍
ഏറെ വിധി കേള്‍ക്കാനൊരുങ്ങിക്കൊള്‍വീന്‍..
ദീനിന്‍ വഴി തെറ്റി നടന്നോര്‍ക്കെല്ലാം
നീറും നരകമന്നുറപ്പാണല്ലോ..
ഈമാന്‍ വെടിയാതെ കഴിഞ്ഞോര്‍ക്കെല്ലാം
ഫിര്ദൌസൊരുങ്ങുന്നൂ പരലോകത്തില്‍..
ആലം ഉടയോനേ റഹീമായോനേ,
നേരും നെറിയുടെ വഴികള്‍ കാട്ട്..

ലൈലത്തുല്‍ഖദ്ര്‍

റമളാനിലവസാനപത്തിലെ
റഹമത്ത് ചൊരിയുന്ന രാവിത്
ലൈലത്തുല്‍ ഖദ്റിന്റെ രാത്രിയില്‍
നെഅമത്തിറങ്ങുന്ന വേളയില്‍,
സത്യവിശ്വാസികളെല്ലോരുമേ
റബ്ബില്‍ സുജൂദിടുന്നെങ്ങുമേ..!
തെറ്റുകുറ്റങ്ങള്‍ പൊറുക്കുവാന്‍
മാറ്റൊത്ത ജീവിതം കാട്ടുവാന്‍
കാരുണ്യവാനായ തമ്പുരാന്‍
റാഹത്തിറക്കുമീ രാത്രിയില്‍
ഈമാന്‍ വെടിയാതെ ജീവിതപ്പാതയിലൂടെ ചരിയ്ക്കുവാന്‍
ഇഅതിക്കാഫിരിയ്ക്കുന്നൂപള്ളിയില്‍ പാപങ്ങളെല്ലാം പൊറുക്കുവാന്‍
നീറും മനസ്സുമായ് കേഴുന്നൂ റബ്ബിന്‍റെ കാരുണ്യം തേടുന്നൂ
പോരിശയേറുമീ രാത്രിയില്‍ തൌബാ ചെയ്തു മടങ്ങുന്നൂ...

തൌഹീദ്

ജാഹിലിയെത്തിന്നിരുളിലാണ്ട ഖുറൈശികള്‍
ലാഹിലാഹില്ലല്ലായെന്നു ചൊല്ലാന്‍ മടിച്ച നാള്‍,
മുത്ത്‌ മുഹമ്മദ് മുസ്തഫാ മുന്നം മക്കത്ത്
സത്യത്തിന്‍ പൊന്‍ വിളക്കേന്തി വന്നൊരാ കാലത്ത്,
ഹീറാ ഗുഹയിലന്നേകനായിട്ടിരിക്കുംപോള്‍,
താഹാ റസൂലിന്‍റെ ചാരത്തെത്തി ജിബിരീലും..!
ഓതുക യെന്നു മലക്ക് ചൊന്നൊരാ നേരത്ത്
ഓതാനറിയില്ലായെന്നു ചൊല്ലി റസൂലുല്ലാ..!
മഗിരിബും പിന്നെ മശിരിക്കും പരിപാലിക്കും
ആലം ഉടയവനായ റബ്ബിന്‍റെ നാമത്തില്‍,
ആരംഭിയ്ക്കുകയെന്നോതി വീണ്ടും ജിബിരീല്
അല്‍ അമീനായുള്ളോരപ്പോളോതി തുടങ്ങുന്നു..
താഹാ റസൂലുള്ള നുബുവത്തും കയ്യേല്‍ക്കുന്നല്ലോ
തൌഹീദിന്‍ പൊന്‍ പ്രഭ ലോകമെങ്ങും പരന്നല്ലോ..!

ദുആ

ഇരു കൈയ്യുമുയര്‍ത്തി ഞാനിരക്കുന്നൂ ദുആയെന്നും,
പരലോകത്തലിവിന്‍റെ കണിക കാണ്മാന്‍..!
ഇഹലോക സുഖങ്ങളില്‍ മയങ്ങി ഞാന്‍ കഴിഞ്ഞപ്പോള്‍,
ഇലാഹിന്‍റെ വഴിയെല്ലാം മറന്നു പോയി ..!!
ദുര മൂത്ത മനസ്സിന്‍റെ അടിമയായ്
കഴിഞ്ഞപ്പോള്‍,
ദുനിയാവ് സ്ഥിരമെന്നു കരുതിപ്പോയി...!
പടച്ചോന്‍റെ നാള്‍വഴിയിലെഴുതിയ കണക്കുകള്‍
തിരുത്തുവാന്‍ കഴിയില്ലന്നറിയുന്നു ഞാന്‍..!
ഒരുപാട് ദുരിതത്തിന്‍ കടല്‍ താണ്ടി വരുന്നേരം,
കരകാണാന്‍ തുണയ്ക്കേണേ റഹീമായോനേ,
ഇരുകൈകളുയര്‍ത്തിക്കൊണ്ടിരക്കുന്നു ദുആ ഞങ്ങള്‍
പരലോകത്തലിവിന്‍റെ കണിക കാട്ട്...!!